قومي اقتصادي ڪائونسل معيشت جي واڌويجهه جي هدفن، سالياماني منصوبابندي 25 – 2024ع بابت ميڪرو اڪنامڪ فريم ورڪ، پنج سالا ترقياتي منصوبي، پائيدار ترقي جي هدفن ۽ پٺتي پيل علائقن کي ترقياتي بجيٽ ۾ ترجيح ڏيڻ جي قدمن جي منظوري ڏئي ڇڏي

اسلام آباد– 10 – جون (اي پي پي) قومي اقتصادي ڪائونسل معيشت جي واڌويجهه جي هدفن، سالياماني منصوبابندي 25 – 2024ع بابت ميڪرو اڪنامڪ فريم ورڪ، پنج سالا ترقياتي منصوبي، پائيدار ترقي جي هدفن ۽ پٺتي پيل علائقن کي ترقياتي بجيٽ ۾ ترجيح ڏيڻ جي قدمن جي منظوري ڏئي ڇڏي جڏهن ته وزيراعظم محمد شهباز شريف چيو آهي ته حڪومت ملڪي ترقي، معيشت جي بحالي ۽ عوام جي خوشحالي جي لاءِ موجوده وسيلن کي استعمال ۾ آڻيندي، معيشت جي حوالي سان سمورن اهم فيصلن ۾ وفاق صوبن ۽ لاڳاپيل ڌرين سان مشاورت کي يقيني بڻائيندو، زراعت ملڪي معيشت ۾ ڪرنگهي جي هڏي جي حيثيت رکي ٿي، زرعي ترقي جي لاءِ صوبن سان مشاورت اهميت رکندڙ آهي. اهڙن خيالن جو اظهار هن قومي اقتصادي ڪائونسل جي اجلاس جي صدارت ڪندي ڪيو. اجلاس ۾ نائب وزيراعظم ۽ پرڏيهي وزير اسحاق ڊار، وفاقي وزيرن خواجه محمد آصف، محمد اورنگزيب، احسن اقبال، احد خان چيما، پنجاب جي وزيراعليٰ مريم نواز شريف، سنڌ جي وڏي وزير سيد مراد علي شاهه، خيبرپختونخواهه جي وڏي وزير علي امين گنڊاپور، بلوچستان جي وڏي وزير سرفراز خان بگٽي، پنجاب جي منصوبابندي ۽ ترقي واري صوبائي وزير مريم اورنگزيب، سنڌ جي آبپاشي واري صوبائي وزير ڄام خان شورو، خيبرپختونخواهه جي وڏي وزير جي صلاحڪار مزمل اسلم، بلوچستان جي منصوبابندي ۽ ترقي واري صوبائي وزير ظهور احمد بليدي، اسٽيٽ بئنڪ جي گورنر جميل احمد ۽ لاڳاپيل اعليٰ وفاقي ۽ صوبائي عملدارن شرڪت ڪئي. وزيراعظم آفيس جي ميڊيا ونگ پاران جاري بيان موجب اجلاس جي صدارت ڪندي وزيراعظم چيو ته ملڪ جي ترقي، معيشت جي بحالي ۽ عوام جي خوشحالي جي لاءِ حڪومت موجوده وسيلن جو بهترين استعمال يقيني بڻائيندي. هن وڌيڪ چيو ته معيشت جي حوالي سان سمورن اهم فيصلن ۾ وفاق صوبن ۽ ڌرين سان مشاورت يقيني بڻائيندو ته جيئن ملڪي ترقي جي لاءِ گڏيل بصيرت جي نتيجي ۾ اهڙا فيصلا ڪيا وڃن جيڪي مثبت هجن ۽ سڀني جي رضامندي شامل هجي، قومي اقتصادي ڪائونسل ملڪي معيشت جي حوالي سان اهم فيصلن جو سڀ کان وڏو فورم آهي جنهن کي معيشت جي بحالي جي لاءِ اهم فيصلن جي لاءِ استعمال ڪنداسين. اجلاس ۾ ڪائونسل گذريل ڏينهن لڪي مروت ۾ دهشتگردن جي حملي ۾ شهيد ٿيندڙ ڪيپٽن محمد فراز الياس شهيد ۽ ٻين فوجي جوانن جي مغفرت جي لاءِ ۽ انهن جي گهرڀاتين جي لاءِ صبر جميل جي دعا ڪئي. وزيراعظم قومي اقتصادي ڪائونسل کي جديد گهرجن سان هم آهنگ ڪرڻ جي لاءِ هڪ ڪميٽي قائم ڪرڻ جي هدايت پڻ ڪئي. ڪميٽي صوبن ۽ ٻين ڌرين سان تفصيلي مشاورت سان نه رڳو قومي اقتصادي ڪائونسل کي وڌيڪ فعال بڻائڻ پر ان کي موجوده گهرجن سان هم آهنگ ڪرڻ جي لاءِ تجويزون جوڙيندي. ڪائونسل کي 24 – 2023ع جي سالياني ترقياتي منصوبي ۽ ڪارڪردگي ۽ 25 – 2024ع جي تجويز ڪيل ترقياتي منصوبي بابت آگاهه ڪيو ويو. اجلاس کي ٻڌايو ويو ته ايندڙ سال جي لاءِ واڌويجهه جي شرح جي هدف ۾ واضح اضافو ڪيو ويو آهي. وزيراعظم ان موقعي تي چيو ته زراعت ملڪي معيشت ۾ ڪرنگهي جي هڏي جي حيثيت رکي ٿي، زراعت جي ترقي جي لاءِ صوبن سان مشاورت انتهائي اهم آهي، يقيني بڻايو وڃي ته زراعت ۽ ٻين شعبن جي حوالي سان صوبن جي تجويزن کي پلان ۾ شامل ڪيو وڃي. ڪائونسل معيشت جي واڌويجهه جي شرح جي هدفن، سالياني منصوبابندي 25 – 2024ع بابت ميڪرو اڪنامڪ فريم ورڪ، Annual Plan 2024 – 25 جي اشاعت ۽ وزارتن، صوبن ۽ خصوصي ادارن کي ان منصوبي تي عملدرآمد يقيني بڻائڻ جي اصولي منظوري ڏئي ڇڏي. ڪائونسل کي تيرهين پنج سالا ترقياتي منصوبي تي پڻ تفصيلي بريفنگ ڏني وئي. ڪائونسل کي ٻڌايو ويو ته منصوبي جي هدفن ۾ ملڪ جي هر خطي خاص طور تي پٺتي پيل علائقن جي ترقي، روانگي واپار ۾ اضافي، ننڍي ۽ وچولي درجي جي صنعت جي فروغ، سماجي تحفظ ۽ غربت جي خاتمي، افرادي قوت جي صلاحيت ۾ اضافي، ناليج اڪانومي جي رخ ۾ ترقي ۽ موسمياتي تبديلي جي مضر اثرن کان بچاءُ جي لاءِ حڪمت عملي شامل آهي. ڪائونسل منصوبابندي واري وزارت کي هدايت ڪئي ته صوبن کي قومي معيشت ۾ مثبت ڪردار ۽ روانگي واپار ۾ اضافي جي لاءِ مختلف شعبن ۾ واضح هدفن تي هڪ ٺوس حڪمت عملي پيش ڪئي وڃي. وڌيڪ هدايت ڪئي وئي ته معيشت جي مجموعي واڌويجهه جي شرح جي هدف کي حاصل ڪرڻ جي لاءِ صوبن کي مشاورتي عمل ۾ شامل ڪيو وڃي ۽ ان جي لاءِ شروعات اهم شعبن مثال طور زراعت کان ڪئي وڃي. ڪائونسل کي معيشت جي بحالي ۽ ملڪي ترقي جي لاءِ قومي هدفن ۽ انهن کي حاصل ڪرڻ جي لاءِ قدمن بابت آگاهه ڪيو ويو. اجلاس کي ٻڌايو ويو ته برآمدي مصنوعات جي تياري، زراعت جي جدت، مصنوعي ذهانت ۽ عالمي معيار سان هم آهنگ انفارميشن ٽيڪنالاجي جي شعبي، پائيدار قابل تجديد توانائي، پاڻي جي ذخيرن جو موثر استعمال، نوجوانن ۽ عورتن جي ترقي ۽ سي پيڪ جي ٻئي مرحلي تي موثر ۽ جلد عملدرآمد جهڙا قدم ايندڙ پنجن سالن ۾ ملڪي معيشت جي ترقي يقيني بڻائيندا. ڪائونسل تيرهين پنج سالا ترقياتي منصوبي جي اصولي منظوري ڏئي ڇڏي. ڪائونسل 24 – 2023ع جي ترقياتي بجيٽ جو جائزو ۽ 25 – 2024ع جي ترقياتي بجيٽ جا تجويز ڪيل انگ اکر پڻ پيش ڪيا ويا. ڪائونسل کي ٻڌايو ويو ته ايندڙ ترقياتي بجيٽ ۾ سي پيڪ جي منصوبن، عالمي سيڙپڪاري جي منصوبن، پڄاڻي ويجهو جاري منصوبن کي ترجيح ڏني ويندي. ان کانسواءِ پائيدار ترقي جي هدفن (ايس ڊي جيز) کي ترقياتي بجيٽ ۾ شامل ڪرڻ ۽ پٺتي پيل علائقن کي ترقياتي بجيٽ ۾ ترجيح ڏني ويندي. ڪائونسل ڄاڻايل قدمن جي منظوري ڏئي ڇڏي. ڪائونسل کي سينٽرل ڊيولپمينٽ ورڪنگ پارٽي (سي ڊي ڊبليو پي) ۽ قومي اقتصادي ڪائونسل جي انتظامي ڪميٽي (ايڪنڪ) جي پهرين اپريل 2023ع کان پهرين مئي 2024ع جي ڪارڪردگي تي رپورٽ پڻ پيش ڪئي وئي.

مضمون کا ماخذ : کمپیوٹر لاٹری کا جیک پاٹ

متعلقہ مضامین