اسلام آباد – 31 – آڪٽوبر (اي پي پي) وزيراعظم عمران خان چيو آهي ته پاڪستان ۽ سعودي عرب جي وچ ۾ تاريخي، پراڻا ۽ ڀائراڻا لاڳاپا آهن، جن جون پاڙون گڏيل عقيدي، تاريخ ۽ گڏيل تعاون تي ٻڌل آهن، ٻئي ملڪ مشڪل وقت ۾ هڪ ٻئي سان گڏ ثابت قدمي سان بيٺل رهيا، ٻئي ملڪ 7 ڏهاڪن کان خصوصي رشتي ۾ ڳنڍيل آهن، سعودي عرب جو ويزن 2030ع منصوبو پاڪستان کي سعودي عرب سان نئون پاڪستان منصوبي کي عملي جامعو پارائڻ جي لاءِ ڳالهين جا موقعا فراهم ڪري ٿو. سعودي عرب جي الرياض اخبار کي انٽرويو ڏيندي وزيراعظم چيو ته پاڪستان سعودي عرب کي آءِ ٽي، انفراسٽرڪچر جي ترقي ۽ زراعت ۾ پنهنجي مهارت جي حصيداري ڪرڻ کانسواءِ هڪٻئي سان گڏ بيٺل آهن. وزيراعظم چيو ته ماضي سان گڏوگڏ موجود دور ۾ پڻ علائقائي ۽ عالمي سطح تي ٿيندڙ اڳڀرائي جي ڏس ۾ پنهنجي لاڳاپن کي تبديل ڪرڻ جي ڪڏهن نوبت نه آئي، ٻنهي ملڪن جي لاڳاپن ۾ ثابت قدمي رهي آهي. وزيراعظم چيو ته اهو رشتو 7 ڏهاڪن جو آهي، اسان جي اها خواهش آهي ته ان تعلق کي هڪ گهري، متنوع ۽ گڏيل فائديمند تذويراتي حصيداري ۾ تبديل ڪيو وڃي، اسان تعاون جي نئين ۽ غيرروايتي شعبن جي ڳولا ڪري تاريخي فائدن کي مستحڪم ڪرڻ جي لاءِ ڪم ڪري رهيا آهيون، اسان چاهيون ٿا ته اسان جا واپاري لاڳاپا ۽ سيڙپڪاري ۾ تعاون اسان جي بهترين لاڳاپن موجب هجي. وزيراعظم چيو ته سعودي عرب جي تازي دوري دوران کيس سعودي پاڪستان سيڙپڪاري جي لاءِ پهرين فورم ۾ شرڪت جو موقعو مليو جنهن ۾ هن واپار جي شعبي ۾ استعمال ۾ نه ايندڙ صلاحيتن جو ادراڪ ڪرڻ جي لاءِ ٻنهي ملڪن جي نجي ۽ ڪارپوريٽ سيڪٽرز کي ڪاروبار ۽ سيڙپڪاري ۾ شامل ڪرڻ جي اهميت تي زور ڏنو. وزيراعظم چيو ته مون کي يقين آهي ته هي فورم اسان جي سيڙپڪاري جي تعاون ۾ نئين دور جي شروعات ڪندو. هڪ سوال جي جواب ۾ هن چيو ته ويزن 2030ع تحت مختلف شعبن ۾ سڌارا متعارف ڪرائڻ تي سعودي قيادت کي ساراهيون ٿا. وزيراعظم چيو ته سندس سعودي عرب جي تازي دوري ۾ ويزن 2030ع تحت سيڙپڪاري جي موقعن، اقتصادي ۽ واپاري لاڳاپن کي مضبوط بڻائڻ جي لاءِ مختلف طريقن تي خيالن جي ڏي وٺ ڪئي وئي. موسمياتي تبديلي تي سربراهه اجلاس جي حوالي سان هن چيو ته هي اجلاس موسمياتي تبديلي جي چئلينج کي منهن ڏيڻ جي لاءِ سعودي قيادت جي ٺوس قدمن جي عزم کي ظاهر ڪري ٿو، گرين سعودي انيشيٽو ۽ گرين مڊل ايسٽ انيشيٽو نه رڳو سعودي عرب پر پوري خطي ۾ فطرت ۽ آبهوا جي تحفظ لاءِ ذڪر جوڳو قدم آهي. وزيراعظم چيو ته موسمياتي تبديلي سان جيڪو خطرو اسان جي زمين کي آهي، اهو حقيقي آهي ۽ هي صحيح رخ ۾ ٺوس قدم کڻڻ جو وقت آهي. وزيراعظم چيو ته پاڪستان ۾ ڪلين اينڊ گرين پاڪستان ۽ 10 ارب سونامي ٽري منصوبن تي ڪم جاري آهي جيڪي انهي طرز جا منصوبا آهن. وزيراعظم چيو ته اسان سمجهون ٿا ته اسان جون ترجيحون ۽ هدف ان سلسلي ۾ هڪ ٻئي سان ملن ٿا، اسان هڪ ٻئي جي تجربن مان فائدو کڻي سگهون ٿا، موسمياتي تبديلي جي اثرن کي گهٽ ڪرڻ جي لاءِ گڏيل تعاون وڌائي سگهون ٿا. مسلمان امت جي اتحاد جي لاءِ پاڪستان ۽ سعودي عرب جي ڪردار جي حوالي سان وزيراعظم چيو ته اسلامي سربراهه ڪانفرنس جي هڪ اهم ميمبر هجڻ جي حيثيت سان سعودي عرب سدائين مسلمان ملڪن جي اتحاد ۽ مسلمان دنيا کي درپيش مسئلا اجاگر ڪرڻ ۾ اهم ڪردار ادا ڪيو آهي، 2020ع ۾ او آءِ سي متفقه طور تي اسلامو فوبيا جي حوالي سان پاڪستان جي پيش ڪيل قرارداد کي منظور ڪيو. وزيراعظم چيو ته اولهه ۾ اسلام جي خلاف وڌندڙ خطرو عالمي سطح تي ڳڻتي جو سبب آهي، اسان پرامن گڏيل بقاءَ ۽ هم آهنگي تي يقين رکون ٿا ڇو ته دهشتگردي ڪڏهن به اسلام جو حقيقي چهرو نه هئي ۽ نه ڪڏهن رهندي. وزيراعظم چيو ته حرمين شريفين جو گهر هجڻ ناطي سعودي عرب جو مسلمان امت جي لاءِ قائداڻو ڪردار فطري آهي، پاڪستان ان سان تعاون ۾ سڀ کان اڳتي هوندو، سعودي عرب پاران مالي معاونت جي حوالي سان سوال جي جواب ۾ هن چيو ته ان مالي معاونت تي سعودي عرب جا ٿورائتا آهيون، اها امداد عالمي سطح تي شين جي قيمتن ۾ اضافي جي ڪري پاڪستان جي ادائيگين جي توازن ۾ مدد ڪندي. هن چيو ته پاڪستان ۽ سعودي عرب جي وچ ۾ پراڻي ۽ تاريخي ڀائراڻن لاڳاپن جون پاڙون گڏيل عقيدي، تاريخ ۽ گڏيل تعاون سان ڳنڍيل آهن، سعودي عرب سدائين مشڪل گهڙيءَ ۾ پاڪستان جي دل کولي مدد ڪئي آهي، سعودي عرب پاران تازي امداد ٻنهي ملڪن جي وچ ۾ دوستي جو عزم آهي.
